ရင်ခတ်တေး (မိုင်မျိုးမျိုးဆန်း)



ရင်ခတ်တေး

(၁)

"ဘယ်တုန်းက ချစ်ခဲ့ဖူးလို့လဲ" တဲ့လား

အေးလေ . .

ကိုယ့်လက်ဖမိုးနဲ့ သုတ်ပစ်ခဲ့တဲ့ မျက်ရည်တွေက

သူ့ပုခုံးပေါ်မှာမှ မစိုစွတ်ဖူးတာပဲ . .

ခေါင်းအုံးလေးပေါ်က ကိုယ့်ရဲ့အိပ်ရေးပျက်အလွမ်းညတွေကို

သူ့အိပ်မက်ထဲမှာတောင်မှ မရိပ်မိစေခဲ့တာပဲ . .

လက်ညိုးလေးနဲ့ရွယ်ခဲ့ဖူးတဲ့ နံပါတ်လေးဟာ

သူ့ဖုန်းထဲမှာ missed call အဖြစ်နဲ့တောင်မှ

ရောက်မသွားခဲ့ဖူးတာပဲ . . .

လွမ်းတိုင်းရေးဖြစ်တဲ့ ကဗျာတွေကို

ယောင်လို့တောင်မှ သူမမြင်ဖူးတာပဲကွယ် . .

(၂)

အိပ်မက်တွေ မက်တယ်

နိုးလာတိုင်း ရင်နာရတယ် . .

လက်တွေ့မှာတော့

သူရှိရာအရောက်သွားချင်တဲ့ ခြေလှမ်းတိုင်းက ထုံကျင်နေပြီး

ကိုယ်ရှိရာအရပ်ကိုကမ်းပေးချင်တဲ့ လက်ကလေးတွေ ရပ်တန့်နေတယ် . .

ခပ်ဟဟ လှောင်ရယ်သံတွေကို

ဆိတ်ငြိမ်ရင်း နားထောင်ရုံသက်သက် နားထောင်မိခဲ့တယ် . .

သတ္တိတွေမဲ့နေခဲ့တာကိုတော့

တစ်နေ့နေ့မှာ ဝန်ခံရင်း တောင်းပန်ရပါဦးမယ် . .

(၃)

အရေးမကြီးပါဘူး . .

morning လို့ နှုတ်ဆက်သံမကြားရတော့ပေမယ့်

တစ်ရက်ပြီးတစ်ရက် နေထွက်နေဆဲပဲ . .

good night လို့ နှုတ်မဆက်တော့ပေမယ့်

တစ်ညပြီး တစ်ည ကုန်လွန်နေဆဲပဲ . .

သူကိုယ့်ကို မလွမ်းတော့ဘူးဆိုတောင်

ကိုယ်ကတော့ လွမ်းနေဆဲ လွမ်းနေမြဲပါပဲကွယ် . .

သူမချစ်တော့ဘူးဆိုရင်တောင်

ကိုယ့်အချစ်တွေကတော့ သူ့အလိုလို လည်ပတ်နေတုန်းပါပဲ . . .

(၄)

သူ့အသံမကြားရတာ တစ်ရက်. .

သူ့အသံမကြားရတာ နှစ်ရက် . . .

သူ့အသံ မကြားရတာ သုံးရက် . . . .

မခေါ်တော့ဘူးလို့ ပြောခဲ့တာကို

သူက နှလုံးသားနဲ့ မတွေးခဲ့လိုက်မိဘူး ထင်ပါရဲ့ . . .

ထားပါတော့လေ . .

သူ့ အသံမကြားရတာ လေး ငါး ရက် . . .

(၅)

အနားမှာ ရှိရင် ပျော်တယ် . .

ဝေးသွားမယ်ဆိုလဲ ပိုပျော်ရမှာပါပဲ . .

တစ်ရက်စောပြီးဝေးတော့

တစ်ရက်ပိုစောပြီး လွမ်းရရုံပါပဲ . .

သူက အစကတည်းက

ငေးရုံပဲ ငေးကြည့်သင့်ခဲ့တဲ့ ကောင်းကင်တစ်ခု . . .

ချစ်မိတဲ့ အမှုမှာ

ကိုယ့်ကိုယ်ကိုယ်ပဲ အပြစ်တင်ချင်စိတ်ရှိခဲ့တယ် . .

(၆)

" ဘယ်တုန်းက ချစ်ခဲ့ဖူးလို့လဲ " ဟုတ်လား . .

လက်ကိုတင်းတင်းဆွဲထားမှ အချစ်မဟုတ်ဘူး . . .

မထားခဲ့ပါနဲ့ အော်ဟစ်နေမှ အချစ်မဟုတ်ဘူး . . .

ချစ်တယ် ချစ်တယ် တစ်ဖွဖွ ပြောနေမှ အချစ်မဟုတ်ဘူး . .

(၇)

နင်သိလား . .

ဘဝထဲကို ဝင်လာတိုင်း အပြုံးမပျက်ဆီးကြိုခဲ့တာလဲ အချစ်ပဲ . .

ထားခဲ့တိုင်း ငြိမ်သက်စွာနေခဲ့တာလဲ အချစ်ပဲ . . .

ပုခုံးစွန်းလေးခေါင်းမှီနေရရုံကျေနပ်နေခဲ့တာလဲ အချစ်ပဲ . .

မချစ်ဘူးလို့ စွပ်စွဲခံရတိုင်း

တိတ်တိတ်လေး ကြေကွဲရတာလဲ အချစ်ပါပဲကွယ် . .

မိုင်မျိုးမျိုးဆန်း