မှတ်ချက် - မျှော်လင့်ခြင်းမဟုတ်ပါ (မိုင်မျိုးမျိုးဆန်း)

မှတ်ချက် - မျှော်လင့်ခြင်းမဟုတ်ပါ 

( ၁ )

ဆုမတောင်းဖြစ်တာကြာပြီ . .

အလွမ်းတွေကလဲ 

အရင်လို တသသပြောလို့ မကောင်းတော့ဘူး . .

သြော် . .

ခွဲခွါခြင်းဆိုတာ အဲ့ဒီလောက်ရင်နာရတယ်ပေါ့ . . .

(နာနာကျင်ကျင် ရယ်မောမိပြန်တယ်. . )

( ၂ )

မောင့်ကိုလွမ်းလား . . လို့ 

ခဏ ခဏ သူမေးခဲ့ဖူးတယ်

အဲ့ဒီတုန်းကတော့ . .

တကယ်လွမ်းလို့ တကယ်ငိုတဲ့အခါ

သူ့ ကမ္ဘာကနေ ကိုယ့်ဆီအရောက်လာမယ်ထင်တာပေါ့ 

နုံအလွန်းတဲ့ ကိုယ့်ကိုကြည့်ပြီး

သူရယ်မောလို့ နေခဲ့မှာသေချာတယ်. .

( ၃ )

ဒဏ်ရာဆိုတာ 

တိုက်ဆိုင်မှုမရှိရင် အနာရွတ်တစ်ခုပါပဲ . .

ခက်တာက . .

အမှတ်တရဆိုတာ နေရာတိုင်းမှာရှိနေတတ်တယ် . . 

သေရာပါမယ့် ဒီဒဏ်ရာနဲ့ ( ကိုယ့်မှာ . .)

သွေးစိမ်းရှင်ရှင်ကျနေရတုန်းပဲ . . . .

( ၄ )

ဝေးရတာကြာတဲ့အခါ

ဟန်ဆောင်ခြင်းပညာဆိုတာ အလိုလိုတတ်လာတယ် . .

အမှန်တရားက မုသားလိုလို

မုသားကပဲ အမှန်တရားလိုလိုလေ . .

မေ့နိုင်ပြီလဲ ကိုယ်ပြောဖူးတယ်

မမေ့နိုင်ဘူးလဲ ကိုယ်ပြောဖူးတယ် . .

ကဲ . . 

ဘယ်တစ်ခွန်းကို မင်းယုံမလဲကွယ် . .

( ကိုယ်သိပ်သိချင်ပါရဲ့ . . .) 

( ၅ )

တကယ်ပါ . .

ရပ်တန့် သွားတဲ့ အချစ်တွေကို လွမ်းတာမျိုးမဟုတ်ဘူး. .

ရိုးရိုးသားသားပါပဲ . . . 

သတိရတယ်ဆိုတာ

ကိုယ့်ကို ချစ်ဖူးခဲ့တဲ့မင်းကိုပါ . .

( ၆ )

ကျေနပ်ပါတယ် . .

သိပ်ကို တိုတောင်းလွန်းတဲ့ကာလ ဆိုပေမယ့် . . . .

ရင်ခုန်သံ အစစ်အမှန်တွေကြားခဲ့ဖူးတယ်လေ . .

( ၇ )

အခုနေများ . . .

ဆုတစ်ခုလောက် 

တောင်းခွင့်ရမယ်ဆိုရင်လေ . .

တယ်လီဖုန်းမှာ ပါးလေးအပ်ပြီး ( အရင်လို )

မျက်လုံးလေးမှိတ်လို့ ပြုံးခွင့်တစ်ခါရချင်တယ်. 

( ၈ )

ကိုယ်ကြားဖူးတယ် . .

"မေ့နိုင်ခြင်း ဆိုတာ 

ဘုရားပေးတဲ့ အကောင်းဆုံးဆုပဲ . ." တဲ့ 

( ၉ )

အချစ်ရေ . .

ကိုယ်တော့ အခုထိ ဘုရားပေးတဲ့ဆုနဲ့လွဲနေတုန်းပဲ . . .

( ၁၀ )

လွမ်းတယ် . . .

                                           မိုင်မျိုးမျိုးဆန်း