အချိန်တစ်ခုကုန်လွန်သွားတဲ့အခါ.... (မိုင်မျိုးမျိုးဆန်း)
အချိန်တစ်ခုလွန်သွားတဲ့အခါ . .
တစ်ခါချော့လိုက်ရုံနဲ့
မကျေနပ်တာမှန်သမျှ မေ့ထားတတ်တဲ့
မိန်းကလေးဟာ ကိုယ်မဟုတ်တော့ဘူး. .
အလွမ်းတွေကို တခမ်းတနား
ဖွဲ့ ဆိုတတ်တာ ကိုယ်မဟုတ်တော့ဘူး. .
အသေးအဖွဲကအစ
တွေးရင်းနဲ့ ဝမ်းနည်းတတ်တာ
ကိုယ်မဟုတ်တော့ဘူး. .
ကတိစကားတစ်ခွန်းကိုယုံစားလို့
ဖြစ်မလာသမျှ ခံစားတတ်တာ
ကိုယ်မဟုတ်တော့ဘူး. .
အဲ့ဒီအခါမှာ . .
အချစ်ဆိုတဲ့ အရာဟာလေ
ရင်ခွင်ထဲ ပိုက်ထားခဲ့ဖူးတဲ့ ဝက်ဝံရုပ်ကလေးလို
ချောင်တစ်ချောင်မှာ ငြိမ်သက်နေကောင်းပါရဲ့ . . .
စွဲလန်းဖူးတဲ့ အတုအယောင်အကြင်နာတွေဟာလဲ
ဆောင်းဦးရဲ့ သစ်ရွက်လေးတွေလို
လေအဝေ့မှာ
လွင့်မြောသွားလိမ့်မယ် . .
ထုထည်ကြီးလှတဲ့ အလွမ်းဆိုတာလဲ
တစ်ခါပြောဖြစ်မှ တစ်ခါပဲသတိရမိတော့မယ်ထင်ပါရဲ့ . .
ကိုယ်ခေါ်ဖူးတဲ့ နာမ်စားလေးတစ်ခုဟာလဲ
မတော်တဆ ကြားမိတဲ့အခါမျိုးမှာ
ပြုံးရုံလေးပဲ ပြုံးမိသွားလောက်တဲ့အထိ
ဟောင်းနွမ်းသွားလိမ့်မယ် . .
အဲ့ဒီအခါ
အေးစက်စက် ဥပေက္ခာတွေနဲ့
ဖန်တရာတေနေတဲ့
နာကျင်မှုတွေကို ရင်မှာစုလို့ . . .
ကိုယ် သူ့ ကို
မေ့တတ်သွားမှာပါလေ . . .။
မိုင်မျိုးမျိုးဆန်း
Comments
Post a Comment