သူတို့ပြောသမျှ ကဗျာနှင့် ပတ်သက်၍

သူတို့ပြောသမျှ ကဗျာနှင့် ပတ်သက်၍

''ကဗျာမှာ အချက်(၄)ချက်ရှိတယ်''


၁။ Choice of words (စကားလုံး ရွေးချယ်မှု)၊

၂။ Thought (အတွေး)၊

၃။ Sensibility (အာရုံခံစားမှု)၊

၄။ အလင်္ကာ၊


ကဗျာကောင်းတစ်ပုဒ်က အဲဒီလေးချက် တစ်ခုခုနဲ့ ငြိနေရတယ်။

ကဗျာကောင်းတစ်ပုဒ်က ဥပမာပြောရရင် ကြိမ်လုံး(၄)လုံးပူးပြီး

ရိုက်သလိုပေါ့။ ဘယ်ကြိမ်လုံးနဲ့ထိသလဲတော့ မသိဘူး။

Choice of words ဆိုတဲ့ စကားလုံးရွေးချယ်မှု ကြိမ်လုံးလား၊

Thought (အတွေး) ကြိမ်လုံးလား၊ တစ်ခုခုနဲ့ပေါ့။ ငြိကို ငြိနေတယ်။


ကိုလေး(အင်းဝဂုဏ်ရည်)

------------------------------------------------


ကဗျာကို ချစ်မြတ်နိုးသည်ဟု ယနေ့ခေတ် ပြောနေကြသည်။

ကိုယ့်ကဗျာကိုယ် ကိုယ်မြတ်နိုးရုံနှင့် မလုံလောက်ပါ။

သူတပါး၏ ကဗျာများကို ချစ်မြတ်နိုးတတ်ဖို့ အလွန်အရေးကြီးသည်။


ယနေ့အထိ ကမ္ဘာလောကကြီး၌ ကဗျာဟူ၍ တင့်တင့်တယ်တယ်

ရှိနေခြင်းကား သူတပါး၏ကဗျာများကို ချစ်မြတ်နိုးသူတို့ ရှိနေသော

ကြောင့်သာဖြစ်လေသည်။


နှိုင်းယှဉ်သစ္စာစကားနှင့်ပြောရလျှင် ကမ္ဘာပေါ်၌ ကဗျာဆရာဆိုသည်က

လက်တစ်ဆုပ်စာသာရှိသည်။ ကဗျာဆရာမဟုတ်ဘဲ ကဗျာကိုချစ်မြတ်နိုး

နေသူတွေက မရေမတွက်နိုင်အောင် ရှိနေသည်။


ကဗျာသာမက အနုပညာအားလုံးအတွက် ''အကောင်းဆုံး''ဟူသောစကားကို

မသုံးနိုင်ပါ။ ကဗျာနှင့် အနုပညာအတွက် အကောင်းဆုံးသဘောကို တိုင်းတာ

နိုင်သည့် ကိရိယာတွေ မရှိပါ။ ''အနှစ်သက်ဆုံး''ဟူသည့် စကားကိုတော့

သုံးနိုင်သည်။ သူ့ အနှစ်သက်ဆုံးရှိသည်။ ကိုယ့် အနှစ်သက်ဆုံးရှိသည်။

သူနှင့်ကိုယ် တူချင်မှတူမည်။ ငြင်းချင်ငြင်း၍ရသည်။ သဘောမတူဘဲ

နေ၍ရသည်။


တက္ကသိုလ် ဘုန်းနိုင်


( ''မန်းချောင်းလရောင်ထဲသို့ အုပ်ဖွဲ့ပျံသန်းလာကြသော ၉၅ ကဗျာငှက်များ''

ကဗျာစာအုပ် အမှာစာမှ ကောက်နှုတ်ချက်...)

----------------------------------------------------


ကဗျာ ဟုတ်၊ မဟုတ်ဆိုတာ ကာရန်မဲ့၊ ကာရန်ရှိဆိုတဲ့အချက်နဲ့သာ

ဆုံးဖြတ်လို့မရဘူး မဟုတ်လား။ ကဗျာစိတ်ကူး ကောင်း၊ မကောင်းနဲ့

ကဗျာစိတ်ကူးကို ပေါ်လွင်အောင် ဖွဲ့ဆိုဖော်ကျူးနိုင်မှု ရှိ၊ မရှိဆိုတာကို

အဓိကထားကြည့်ရမှာပေါ့။


မောင်စွမ်းရည်


(ပေဖူးလွှာ စာပေအင်တာဗျူး၊ ဝင်းငြိမ်းနှင့် မောင်စွမ်းရည် တွေ့ဆုံခြင်း)

------------------------------------------------


အနုပညာကို တည်ဆောက်တဲ့နေရာမှာ ရိုးသားမှုအခြေခံမပါရင်

အနုပညာဟာ ဘယ်လိုမှ ခိုင်မြဲတဲ့အနုပညာ ဖြစ်လာမှာမဟုတ်ဘူး။


အနုပညာကိုသာ သေချာအောင်လုပ်ကြပါ။

ကျန်တာ သူ့အလိုလိုပဲ ရထားဆိုက်လာမှာပါ။


မောင်ချောနွယ်


(မောင်ချောနွယ်သို့ အင်တာဗျူး- စာအုပ်မှ)

-----------------------------------------------


ကဗျာဆိုတာ...

လောကကြီးထဲမှာ မရှိတဲ့လူတစ်ယောက်နဲ့

စကားပြောရသလိုပဲ။


ဒိန်းဇက်

--------------------------------------------


''ကဗျာဆိုတာ''


ကဗျာဆိုတာ

လူ့စဉ်းစားဉာဏ်ရဲ့ပဲ့တင်သံ

လူ့နှလုံးသားရဲ့ခုန်လှုပ်သံ

လူ့စိတ်ဓာတ်ရဲ့မြည်ဟီးသံ

လူ့မျှော်လင့်ချက်ရဲ့သီကျူးသံ

ကဗျာဆိုတာ

ကျွန်မတိုရဲ့ရုန်းကန်သံပါပဲ။


အောင်ဆန်းစုကြည်

--------------------------------------------


''နီကိုရဲနဲ့ ထူးအိမ်သင်တို့ စကားလက်ဆုံ''


နီကိုရဲ။ ။ ကိုအောင်ဝေးက ကဗျာကို သီချင်းလုပ်မယ်၊

           ကဗျာကို ရုပ်ရှင်ရိုက်မယ်လို့ ပြောဖူးတယ်၊

           ကိုငှက် ဘယ်လိုထင်လဲ။


ထူးအိမ်သင်။ ။ ကဗျာကို သီချင်းလုပ်ဖို့က နီးစပ်တယ်ဗျ၊

                  ဖြစ်လည်းဖြစ်နိုင်တယ်၊ လုပ်လည်းလုပ်နေကြတာပဲ၊

                  မောင်စိန်ဝင်း(ပုတီးကုန်း)ရဲ့ကဗျာကို ကိုတိုးကြီးဆိုတာ

                  ကောင်းတာပဲ၊ ကဗျာကိုယ်၌ကလည်း သီချင်းဖြစ်လောက်တဲ့

                  အသံ,စကားလုံး,ရည်ရွယ်ချက် စတာတွေ ရှိနေရမှာပေါ့၊

                  သူလို ကိုယ်လိုရေးတဲ့ ကဗျာကိုတော့ သီချင်းလုပ်လို့

                  ထူးခြားမှာ မဟုတ်ဘူး၊ အခု ကိုဒီရဲ့ကဗျာ ဇာမဏီငှက်ကို

                  သီချင်းလုပ်တာ ဖြစ်တာပဲ၊ ဒါပေမယ့် ကဗျာကို ရုပ်ရှင်ရိုက်မယ်

                  ဆိုတာကြီးကတော့ ခပ်ရူးရူးအတွေးပါဗျာ၊ ဘယ်လိုမှ မဖြစ်နိုင်

                  ပါဘူး။


နီကိုရဲ။ ။ ကဗျာရှည်ဆိုရင်တော့ ဖြစ်နိုင်မယ်ထင်ပါတယ်။


ထူးအိမ်သင်။ ။ ကြိုးစားမကြည့်ရဘူးတော့ ကျွန်တော် မပြောပါဘူး၊

                  ဒါပေမယ့် ကဗျာဟာ လွတ်လပ်တယ်ဗျ၊ တစ်သီးပုဂ္ဂလ

                  ဆန်တယ်၊ ကဗျာထဲမှာပါတဲ့ ညနေဟာ ခင်ဗျားဖတ်ရင်

                  ခင်ဗျား ညနေပဲ၊ ကျွန်တော်ဖတ်ရင် ကျွန်တော့် ညနေပဲ၊

                  တူမှာမဟုတ်ဘူး၊ ရုပ်ရှင်ရိုက်လိုက်ရင် သူတို့ပြတဲ့ညနေ

                  ဖြစ်သွားမယ်၊ ခင်ဗျားတို့ ကျွန်တော်တိုရဲ့ညနေ မဟုတ်

                  တော့ဘူး၊ တိုးတက်လာတဲ့နည်းပညာက ဆန်းသစ်မှု

                  နောက်ကို လိုက်နိုင်တယ်၊ ကဗျာရဲ့နူးညံ့မှုကိုတော့

                  သူ ယူပေးနိုင်မှာ မဟုတ်ဘူး။


(ထူးအိမ်သင် ကွယ်လွန်ခြင်း (၂)နှစ်မြောက်တွင် ထုတ်ဝေခဲ့သော

''အစိမ်းရင့်ရောင်ရက်စွဲများ'' စာအုပ်မှ...)

-----------------------------------------------------


''Young Poets'' ''လူငယ် ကဗျာရှင်များ''


ဘယ်ဟန်နဲ့ပဲဖြစ်ဖြစ်

ကြိုက်သလိုရေး

တံတားအောက် သွေးချောင်းအစီးများလို့

ဟန်တစ်ခုတည်းသာ မှန်တယ်လို့

မယူသင့်တော့ဘူးလေ

ကဗျာတွင် ဘာမဆို ခွင့်ပြုတယ်

ကန့်သတ်ချက်တစ်ခုတော့ ရှိတာပေါ့

စာရွက်ပေါ် ဗလာထက်တော့ သာရလိမ့်မယ်။


(ချီလီ ကဗျာဆရာ Nicanor Parra)

(မြန်မာပြန်သူ ဆရာမြဇင်)

---------------------------------------------------