ငါ၏ရိုမီယိုသို့...... (မိုင်မျိုးမျိုးဆန်း)

ငါ၏ရိုမီယိုသို့......

( ၁ )

ချစ်တယ်လို့ နောက်တစ်ခါပြောဖို့

မာနဘယ်လောက်များများ ချခင်းရမလဲ . . .

မဆုံနိုင်တာသိရဲ့ နဲ့

ကျောချင်းကပ်ထားခဲ့မိတာ မှားတယ် . .


ငါဆိုတဲ့ အမိုက်အမဲက

နောင်တရဖူးတယ်ဆိုလဲ

ဒီထက်ပို လက်မဆွဲထားခဲ့မိလို့ ပဲဖြစ်မှာပါ

ငါ့ရဲ့ ရိုမီယို . .

ငါ့အချစ်ကို နင်မယုံကြည်တာ

ရင်အနာရဆုံးပါပဲ . . .


( ၂ )

ရန်ဖြစ်တယ် ပြန်ချစ်တယ်

လူပြောများတဲ့ ဖြစ်စဉ်တစ်ခုပါပဲ

နင်နဲ့ငါကျမှ

ရန်ဖြစ်ချိန်က ပြန်ချစ်ချိန်ထက်

ဘာလို့ ပိုပိုများနေရတာလဲ

တစ်ခုခုတော့ မှားနေပြီ . .


( ၃ )

မျက်ရည်တွေမိုးလိုရွာချလိုက်ရုံနဲ့

ရင်တစ်ခုလုံးပေါ့သွားရင် ဘယ်လောက်ကောင်းလိုက်မလဲ

ဝဋ်ကြွေးဆိုတာ

ဘယ်လောက်ဆပ်ဆပ်မကုန်ဘူးထင်ပါရဲ့. . . .


( ၄ )

ဝေးကြပြီဆိုမှတော့

လွမ်းနေလိုက်ရုံပေါ့

နှစ်ဦးနှစ်ဘက်ချစ်မှ အချစ်လို့ခေါ်သလား

ငါတစ်ယောက်ထဲချစ်နေလဲ

ဒီအချစ်က လျော့ နည်းသွားမှာမှ မဟုတ်တာဘဲကွယ် . . .


( ၅ )

သတိရတယ်ဆိုတာ

ဆံပင်တိုတို ညှပ်ရမလားလို့

တိုင်ပင်ချင်တာမျိုး . . .

ကောင်မလေးတွေနဲ့ ဝေးဝေးနေနော်လို့

သတိပေးချင်တာမျိုး. . .

နင့်ငါ့ကို မချစ်ဘူးလို့

အရင်လိုဂျစ်တိုက်ချင်တာမျိုး. .

နောက်ပြီး . .

ပြောစရာအထွေအထူးမရှိလဲ

"မောင်ရေ . . မောင်ရေ" လို့

ခဏ ခဏ ခေါ်နေချင်မိတာမျိုး ပေါ့ . .


( ၆ )

ရိုမီယိုရေ . .

အချစ်ဆိုတာ

ပေးသလောက်ပဲ ယူရတာမျိုးလား

ငါ့အတွက်ခွဲတမ်းက နည်းလွန်းတယ်လို

နှုတ်ခမ်းဆူချင်တယ် . .


( ၇ )

အိပ်မရတဲ့ ညတွေဆို

အလွမ်းတွေကို ထူထူခင်းလို့

အခြားတစ်ယောက်နဲ့ ဖုန်းပြောနေမယ့် နင့်ကို

လွမ်းလိုက်တာ. . .


( ၈ )

ဘဝမှာ ရွေးစရာတွေများလွန်းရင်

ငါ့ကိုထားခဲ့စမ်းပါကွယ် . .

အပြုံးတစ်ချက်နဲ့

ရှုံးခဲ့သမျှကို မျက်ကွယ်အပြုနိုင်ဆုံးလူက

ငါပဲမို့ လား. .

ရူးမိုက်လိုက်ပုံများ

ဒဏ်ရာတွေကိုမှ ဖက်တွယ်ထားချင်သတဲ့ . . .


( ၉ )

ရိုမီယိုရေ . .

ဟားတိုက်လို့ လှောင်ရယ်လိုက်စမ်းပါ

ပြီးတော့

နင့်ကမ္ဘာကို သော့ခတ်လို့

တိတ်တိတ်လေး အိပ်မောကျလိုက်စမ်းပါကွယ် . . .


( ၁၀ )

နင် ငါ့ကို တကယ်မချစ်ဘူးလို့

တွေးမိတိုင်း နင့်လက်ကို လွှတ်ချထားခဲ့မိတာ

ငါ့အမှားဆိုရင် . .

ငါ့လက်ကို ပြန်ဖမ်းဆုပ်လို့

အမှန်တရားကို

ဖော်ထုတ်ပြသင့်တယ် မထင်မိဘူးလား . .

ငါ့ရဲ့ ရိုမီယိုဟာ

အဲ့ဒီလောက် ဥာဏ်နဲသူတစ်ယောက်မှ

မဟုတ်တာဘဲကွယ် . .


( ၁၁ )

ချစ်တယ်လို့ နောက်တစ်ခါပြောရင်

အရင်လို ပန်းတွေပွင့်ပါဦးမလား . .

အက်ကြောင်းရာအဆက်အထုံးတွေနဲ့

ငါတို့ ဇာတ်လမ်း

ကြေမွနေလိုက်ပုံများလေ . .

ထိလိုက်ရုံနဲ့ တစ်စစီကွဲထွက်သွားမယ့်

ဆပ်ပြာပူဖောင်းလေး တစ်ခုလိုပါပဲလားကွယ်. .


( ၁၂ )

ငါ့ရဲ့ရိုမီယိုရေ . .

ငါ့အချစ်က မွန်းကြပ်စေတယ်ဆိုရင်

တွေဝေခြင်းမရှိ ထားခဲ့နိုင်ပါတယ် . . . .

နင်မသိခဲ့တာက

စိတ်ကောက်ရသူက

ချော့တဲ့သူထက် ပိုနာကျင်ရတယ်ဆိုတာပါပဲ . .


( ၁၃ )

နေရောင်ခြည်ကို မျှော်လင့်ပါ. .

ဖြစ်တည်မှုကို တန်ဘိုးထားပါ . .

လူတွေကြားမှာ စီးမျောပါ. .

သူတစ်ပါးကို ထွင်းဖောက်မြင်တတ်ပါစေ.


ကဗျာတွေကို အဖော်ပြုပါ . .

နေမကောင်းရင်ဆေးသောက်ပါ

တကယ်ချစ်ရင် အတ္တကင်းကင်းထားပါ

ရန်ဖြစ်တိုင်း အရင်စခေါ်ပါ . .

သူ့ မျက်ရည်တွေကို ဂရုစိုက်ပါ. .

သူ ခေါ်တိုင်း ထူးဖို့ ဝန်မလေးပါနဲ့ . .


( ၁၄ )

နောက်ဆုံးအနေနဲ့မှာချင်တယ် ရိုမီိယို . .

အချစ်စစ်နဲ့ တွေ့ဖြစ်ခဲ့မယ်ဆိုရင်

ဟောဒီက အမိုက်အမဲငါ့ကို

ကိုယ်ချင်းစာတတ်ဖို့ လဲ

နင်မမေ့လိုက်ပါနဲ့လားကွယ်. . .။ ။

 

                         မိုင်မျိုးမျိုးဆန်း